مه‌سرور بارزانی پێشوازی له‌ بالیۆزی به‌ریتانیا له‌ توركیا ده‌كات

مه‌سرور بارزانی پێشوازی له‌ بالیۆزی به‌ریتانیا له‌ توركیا ده‌كات

ئه‌مڕۆ 29/9/2016 مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان له‌ میانی پێشوازیكردنی له‌ ریچارد مۆر بالیۆزی به‌ریتانیا له‌ توركیا رایگه‌یاند، هیچ گومانم نییه‌، كه‌ له‌ كۆتاییدا تیرۆریستانی داعش له‌ عێراق تێكده‌شكێنرێن، به‌ڵام گرنگه‌ كار بۆ دروستكردنه‌وه‌ی متمانه‌ له‌نێوان پێكهاته‌كانی عێراق بكرێت.
له‌ دیدارێكدا گفتوگۆ له‌سه‌ر دوا په‌ره‌سه‌ندنه‌ سیاسی و سه‌ربازییه‌كان له‌ عێراق و رۆژهه‌ڵاتی ناوه‌ڕاست كرا و هه‌ردوولا جه‌ختیان له‌ هه‌ڵمه‌ت و هه‌نگاوه‌كانی شكاندنی داعش كرده‌وه‌ و دووپاتیان له‌ گرنگی رزگاركردنی گشت ئه‌و ناوچانه‌ كرده‌وه‌، كه‌ داعش داگیری كردوون به‌ شاری مووسڵه‌وه‌ش.

په‌یوه‌ست به‌ به‌ڕێوه‌بردنی مووسڵ له‌ دوای داعش، مه‌سرور بارزانی جه‌ختی له‌ رێككه‌وتنی سیاسی له‌نێوان ته‌واوی پێكهاته‌كانی شاره‌كه‌ كرده‌وه‌ و رایگه‌یاند، هیچ گومانم نییه‌، كه‌ له‌ كۆتاییدا تیرۆریستانی داعش له‌ عێراق تێكده‌شكێنرێن، به‌ڵام گرنگه‌ كار بۆ دروستكردنه‌وه‌ی متمانه‌ له‌نێوان پێكهاته‌كانی عێراق بكرێت بۆ سه‌قامگیری و به‌رقه‌راربوونی ئاشتی. هه‌روه‌ها باسی له‌وه‌شكرد، كه‌ له‌پێناو دروستكردنی هه‌ماهه‌نگی پێویست بۆ ئۆپه‌راسیۆنی رزگاركردنی مووسڵ فه‌رمانده‌كانی پێشمه‌رگه‌ی كوردستان له‌ گفتوگۆی به‌رده‌وام دان له‌گه‌ڵ فه‌رمانده‌ سه‌ربازییه‌كانی سوپای عێراق و هاوپه‌یمانی جیهانی دژ به‌ تیرۆر.

Back