مه‌سرور بارزانی بە جیا لەگەڵ سه‌رۆكی یەکێتی كریستیان دیموكراتی ئه‌ڵمانی (CDU) و شاندێکی پەرلەمانی ئەڵمانیا کۆبۆوە


ئەمڕۆ هەینی ١٥-٢-٢٠١٩ له‌ چوارچێوه‌ی چالاکی و كۆبوونه‌وه‌كانیدا لە میونشن، مه‌سرور بارزانی، راوێژکاری ئەنجومەنی ئاسایشی هەرێمی کوردستان له‌گه‌ڵ ئانیگریت كرامپ كارینباوه‌ر سه‌رۆكی یەکێتی كریستیان دیموكراتی ئه‌ڵمانی (CDU) کۆبۆوە.
لە دیدارەکەدا پتەوکردنی پەیوەندی دووقۆڵی نێوان هەرێمی کوردستان و ئەڵمانیا لە بوارە جیاجیاکاندا تاوتوێکرا. لەلای خۆیەوە مەسرور بارزانی پیرۆزبایی لە خاتوو كرامپ كارینباوه‌ر کرد بە بۆنەی بوونی بە سەرۆکی (CDU) و جەختی لە پێویستی بەردەوامبوونی هاوکاری و پشتیوانی ئەڵمانیا بۆ هەرێمی کوردستان کردەوە، بەتایبەتی لە بواری مەشق و راهێنان بە ‌هێزەکانی پێشمەرگە و فریاگوزاری مرۆییەوە.
لەبەشێکی دیکەی دیدارەکە باس لە تەحەدییە ئابوورییەکانی بەردەم کابینەی داهاتووی حکوومەتی هەرێمی کوردستان کرا، لەوبارەوە مەسرور بارزانی داوای لە خاتوو كرامپ كارینباوه‌ر کرد، لە میانەی ئەزموون و هونەرییەوە یارمەتی و هاوکاری بەرنامەی ریفۆرمی حکوومەتی هەرێمی کوردستان بکەن.
هەر ئەمڕۆ هەینی مه‌سرور بارزانی، راوێژکاری ئەنجومەنی ئاسایشی هەرێمی کوردستان له‌گه‌ڵ شاندێکی پەرلەمانی ئەڵمانیا بە سەرۆکایەتی د. نۆبێرت رۆتگن سەرۆکی لیژنەی کاروباری دەرەوە کۆبووەوە.
لە دیدارەکەدا مەسرور بارزانی سوپاسی گەل و حکوومەتی ئەڵمانیای کرد لەبەرامبەر یارمەتییە سەربازییەکانیان بۆ هەرێمی کوردستان لەشەڕی دژ بە تیرۆریستانی داعش و رایگەیاند، بە پاڵپشتی ئەو یارمەتییە سەربازیانەی ئەڵمانیا بۆ هەرێمی کوردستان رەوتی شەڕ بە بەرژەوەندی سەرکەوتنی پێشمەرگە دژ بەو رێکخراوە تیرۆریستییە گۆڕا.

Back