مەسرور بارزانی و وه‌زیری به‌رگری ئه‌ڵمانیا كۆبۆنەوە

ئەمڕۆ شەممە 16/02/2019، لە دووەم رۆژی کۆنفرانسی ئاسایشی میونشن، مەسرور بارزانی،راوێژکاری ئەنجومەنی ئاسایشی هەرێمی کوردستان لەگەڵ خاتوو ئۆرسۆلا ڤۆندێرلاین، وه‌زیری به‌رگری ئه‌ڵمانیا كۆبووه‌وه‌.

لە دیدارەکەدا رەوشی ناوچەکە بەگشتی و پەیوەندی دووقۆڵی نێوان هەرێمی کوردستان و ئەڵمانیا تاوتوێکرا و جەخت لە پەرەپێدان و پابەندبوون بە پەیوەندی هاوبەشی نێوان هەرێمی کوردستان و ئەڵمانیا کرایەوە.

مەسرور بارزانی ئاماژەی بە رۆڵی ئەڵمانیا لە پشتیوانی هەرێمی کوردستان کرد و سوپاسی گەل و حکوومەتی ئەڵمانیای کرد بۆ دروستکردنی نەخۆشخانەی پێشمەرگە و رایگەیاند، دروستکردنی ئەم نەخۆشخانەیە رێزگرتن و پێزانینی ئاڵمانیا بەرامبەر قوربانییەکانی هێزی پێشمەرگە دەردەخات.

هەر لەو دیدارەدا گفتوگۆ لەبارەی گرینگی توانا و شارەزایی ئەڵمانیا لە بواری بونیاتنان و راهێنان لە هەرێمی کوردستان و عێراق کرا.

لەلای خۆیەوە خاتوو ئۆرسۆلا ڤۆندێرلاین، وه‌زیری به‌رگری ئه‌ڵمانیا ئاماژەی بە گرینگی ئاسایش و سەقامگیری کوردستانێکی بەهێز کرد و دووپاتی کردەوە کە لە هاوکاری و پشتیوانییەکانیان، بەتایبەتی لە مەشق و راهێنان و رێکخستنەوەی لیواکانی هێزی پێشمەرگە بەردەوام دەبن.

تاوتوێکردنی رەوشی سوریا و پێشهات و پەرەسەندنەکانی ناوچەکە تەوەرێکی دیکەی دیدارەکە بوو.

Back